Nov
06
2013
--

Máis lecturas do libreiro

Unha das principais satisfaccións do meu traballo é poder ler libros, moitos libros. Ora ben, a pesar da imaxe romántica que se ten do oficio de libreiro, este non sempre pode ler todo o que quixera nin cando quixera, mais en fin, o certo é que trato de dedicarlle todo o tempo que podo a ler, máis alá de todo aquilo que non é ler: catalogar, levar a contabilidade, facer pedidos, limpar a propia libraría… Outro día se cadra podemos falar do grande pracer que é parolar cos clientes.

Na última entrada sobre as miñas lecturas quedara en que estaba a ler Librerías, de Jorge Carrión e Camino de Ida, de Ricardo Piglia. Con este ensaio podemos viaxar de libraría en libraría, de Paris a San Francisco, de Estambul a Buenos Aires, nunha auténtica volta ao mundo movida pola fascinación e o amor polos libros e pola conciencia triste de que as librarías, tal como as coñecemos, están a morrer.

Lin Camino de Ida, de Ricardo Piglia (Anagrama, 17,90€) por curiosidade: nunca lera nada deste autor argentino e faláronme moi ben del. Esta novela está protagonizada por un profesor universitario argentino, Emilio Renzi, unha especie de alter ego do escritor, que vai traballar aos Estados Unidos. Ao pouco de chegar, morre a profesora estadounidense que o contratara. El está no punto de mira da policía, mais o culpábel é outro, un terrorista chamado Thomas Munk. A novela está entre a autobiografía novelada e a novela policiaca. Tamén ten un toque de socioloxía ou até de investigación xornalística sobre a violencia na cultura estadounidense.

Unha tumba para Boris Davídovich (Rinoceronte, 14€) pareceume unha novela excepcional, tamén pola tradución que fai Jairo Dorado. Ora ben, máis que novela é un conxunto de relatos cun tema en común (e con personaxes en común), que poderíamos denominar “a revolución traicionada”: revolucionarios esmagados polo totalitarismo. Danilo Kis , o autor, é considerado un dos mellores autores da literatura iugoslava (ou polo menos en lingua serbo-croata) da segunda metade do século.

O poder de Amabel , de Érica Esmorís, está editado por Sushi Books, un selo editorial especializado en literatura infantil. Á parte do libro de Esmorís, editou tamén recentemente Xildas, de Antonio Manuel Fraga (autor do Prémio Merlin deste ano, O Castañeiro de Abril).

Ambos libros parecen estar dirixidos prioritaramente a nenas e nenos de entre 9 e 12 anos, aínda que como sempre isto dependa máis de cada neno/a, do seu hábito lector. No caso de O poder de Amábel, creo que ten grandes doses de humor e quizá maior atractivo para os nenos/as, por estar contado en primeira persoa por Amabel, que anda á procura do seu superpoder oculto. No caso de Xildas, tamén é unha novela moi recomendábel, moi entretida, novela de aventuras protagoniada por unha nena, Catuxa, que encontra un trasno (Xildas), con que vivirá as súas aventuras.

Outro libro que tiña moitas ganas de ler era A irmandade da uva (Hugin e Munin, 16€). Como é habitual nesta editora, a tradución pareceume excelente. A novela ten moito de autobiografía, como acontece noutras obras do autor como El vino de la juventud, publicada recentemente por Anagrama. O protagonista, Henry Molise, fala en primeira persoa e cun estilo directo, sen moitos requintes, sobre a súa familia italo-americana, nomeadamente sobre o seu pai. Fante é considerado un precursor do “realismo sucio” estadounidense, encarnado por Bukowski. Este último autor tamén está editado por Hugin e Munin (Servizo de Correos).

 

 

 

 

 

 

Finalmente, lin un libro de Daniel Pennac (Mondadori, 15.89€) , Señores niños. Os protagonistas son tres nenos parisinos castigados polo seu profesor que, farto das poucas ganas de traballar, obrígaos a facer unha composición escrita sobre un tema: que é o que pasaría se descubrisen que acordaron transformados en adultos, e os adultos da casa, acordaron como nenos. O libro é divertido, ben escrito e cheo de tenrura e cumplicidade cos nenos que fomos (e que aínda somos).

 

 

Powered by WordPress | Aeros Theme | TheBuckmaker.com WordPress Themes